ഭാര്യയോടു വഴക്കിട്ട്, തിളച്ച കഞ്ഞിവെള്ളം എട്ടുവയസുള്ള മകളുടെ മേല്‍ ഒഴിച്ചു; അ‌ച്ഛൻ അ‌റസ്റ്റില്‍

 മലപ്പുറം: മദ്യപിച്ച്‌ വീട്ടിലെത്തി, ഭാര്യയുമായി വഴക്കിട്ട്, എട്ടുവയസുകാരിയായ മകളുടെ മേല്‍ തിളച്ച വെള്ളമൊഴിച്ച പിതാവ് അ‌റസ്റ്റില്‍.ഊർങ്ങാട്ടിരി പഞ്ചായത്തില്‍ കക്കാടംപൊയില്‍ കരിമ്പ് ഉന്നതിയിലെ നാടുവാഴി വീട്ടില്‍ എം. മജു (47) ആണ് അറസ്റ്റിലായത്. 

മദ്യപാനത്തിന് ശേഷം വീട്ടിലെത്തിയ ഇയാള്‍ ഭാര്യയുമായി വഴക്കിട്ടു. വഴക്ക് മൂത്തതോടെ അ‌ടുപ്പത്തിരുന്ന തിളച്ച കഞ്ഞിവെള്ളം ഇയാള്‍ ഭാര്യക്ക് നേരേ എടുത്ത് ഒഴിച്ചു. എന്നാല്‍ ഭാര്യ പെട്ടെന്ന് ഒഴിഞ്ഞുമാറിയപ്പോള്‍ പിന്നില്‍ നിന്ന മകളുടെ ദേഹത്തേക്ക് ഈ തിളച്ച വെള്ളം വീഴുകയായിരുന്നു. ഇതിനെത്തുടർന്ന് കുട്ടിയുടെ കാലിന് ഗുരുതരമായ പൊള്ളലേറ്റു.

തുടർന്ന് പരുക്കേറ്റ മകളെ പിതാവ് തന്നെ ആശുപത്രിയില്‍ എത്തിച്ചു. അ‌തിന് ശേഷം ഇയാള്‍ അ‌വിടെനിന്ന് രക്ഷപ്പെട്ടു. കുട്ടിയെ പിന്നീട് കോഴിക്കോട് മെഡിക്കല്‍ കോളേജ്‌ ആശുപത്രിയിലേക്കു മാറ്റി. സംഭവ ശേഷം ഒളിവില്‍പോയ മജുവിനെ പിന്നീട് പോലീസ് ചുണ്ടത്തുപൊയിലില്‍നിന്ന് പിടികൂടിയത്. തുടർന്ന് കോടതിയില്‍ ഹാജരാക്കി റിമാൻഡ്‌ചെയ്തു.