കിണർ ഇടിഞ്ഞു; വീട് അപകടഭീഷണിയിൽ, കുടുംബത്തെ സുരക്ഷിത സ്ഥാനത്തേക്ക് മാറ്റി

 തേഞ്ഞിപ്പലം: കടുക്കാട്ടുപാറയിൽ മുസ്തഫയുടെ വീടിനോട് ചേർന്നുള്ള കിണർ ഇന്ന് രാവിലെ 8 മണിയോടെ പൂർണമായും ഇടിഞ്ഞുവീണു. കിണറിനോട് ചേർന്നിരുന്ന വീടിന്റെ തറഭാഗത്തുള്ള മണ്ണും വലിയ തോതിൽ ഇടിഞ്ഞതോടെ വീടും അപകടഭീഷണിയിലായി.

സംഭവത്തെ തുടർന്ന് വീടിന്റെ തറയിൽ വിള്ളലുകൾ രൂപപ്പെട്ടിട്ടുണ്ട്. കൂടുതൽ അപകടസാധ്യത കണക്കിലെടുത്ത് വീട്ടിലുണ്ടായിരുന്നവരെ ഉടൻ തന്നെ സുരക്ഷിതമായി ഒഴിപ്പിച്ച് തൊട്ടടുത്ത വീട്ടിൽ താൽക്കാലികമായി താമസിപ്പിച്ചിട്ടുണ്ട്.

ഈ പ്രദേശത്ത് മുൻപും മണ്ണിടിച്ചിലും മതിൽ ഇടിഞ്ഞുവീഴലും ഉണ്ടായിട്ടുണ്ട്. അന്ന് മുസ്തഫയുടെ വീടിനോട് ചേർന്ന ഭാഗത്തെ സംരക്ഷിക്കുന്നതിനായി വായ്പയെടുത്ത് കോൺക്രീറ്റ് സംരക്ഷണഭിത്തി നിർമ്മിച്ച ശേഷമാണ് പ്രശ്നം പരിഹരിച്ചിരുന്നത്. എന്നാൽ ഇപ്പോൾ  വീട്ടിലെ കിണർ തന്നെ ഇടിഞ്ഞതോടെ കുടുംബം വലിയ ആശങ്കയിലാണ്.

കിണർ ഇടിഞ്ഞതിനെ തുടർന്ന് സമീപത്തെ വീടുകൾക്കും അപകടഭീഷണി നിലനിൽക്കുന്നതായി നാട്ടുകാർ ആശങ്കപ്പെടുന്നു. ബന്ധപ്പെട്ട അധികൃതർ അടിയന്തരമായി സ്ഥലത്തെത്തി പരിശോധന നടത്തി ആവശ്യമായ സുരക്ഷാ നടപടികൾ സ്വീകരിക്കണമെന്ന ആവശ്യവും ശക്തമാകുകയാണ്.