മൊബൈല്‍ ഫോണില്‍ സംസാരിച്ച്‌ ബസ് ഓടിച്ച ഡ്രൈവര്‍ക്കെതിരെ കേസ്, ബസ് പിടിച്ചെടുത്തു

മലപ്പുറം: കുറ്റിപ്പുറം ദേശീയപാതയില്‍ മൊബൈല്‍ ഫോണില്‍ സംസാരിച്ചുകൊണ്ട് അപകടകരമായ രീതിയില്‍ ബസ് ഓടിച്ച ഡ്രൈവർക്കെതിരെ പോലീസ് കേസെടുത്തു.

മനുഷ്യജീവന് അപകടമുണ്ടാക്കുന്ന വിധത്തില്‍ വാഹനമോടിച്ചതിനും, ഡ്രൈവിങ്ങിനിടെ ഫോണ്‍ ഉപയോഗിച്ചതിനുമാണ് കേസ്. സംഭവത്തില്‍ ശാസ്താ എന്ന് പേരുള്ള ബസ് കുറ്റിപ്പുറം പോലീസ് കസ്റ്റഡിയിലെടുത്തു. കഴിഞ്ഞ ദിവസം കുറ്റിപ്പുറത്തുണ്ടായ ബസ് അപകടത്തിന് പിന്നാലെയാണ് ദൃശ്യങ്ങള്‍ പുറത്തുവന്നത്.

കുറ്റിപ്പുറത്ത് അപകടം നടന്ന സ്ഥലത്ത് നിന്ന് 100 മീറ്റർ മാറി താലൂക്ക് ആശുപത്രിക്ക് സമീപമുള്ള ദേശീയപാതയിലാണ് സംഭവം. ഒരു കയ്യില്‍ മൊബൈല്‍ ഫോണ്‍ ചെവിയില്‍ ചേർത്തുപിടിച്ചും മറുകയ്യില്‍ സ്റ്റിയറിങ്ങും പിടിച്ച്‌ അശ്രദ്ധമായി വാഹനമോടിക്കുന്ന ദൃശ്യങ്ങളാണ് പുറത്തുവന്നത്. ഡ്രൈവർമാരുടെ ഇത്തരം ഫോണ്‍ വിളിയും അശ്രദ്ധമായ ഡ്രൈവിങ്ങും നിരന്തരം ശ്രദ്ധയില്‍ പെട്ടതിനെ തുടർന്ന് തെളിവിനായി നാട്ടുകാർ ദൃശ്യങ്ങള്‍ പകർത്തുകയായിരുന്നു.

അതേസമയം കുറ്റിപ്പുറത്ത് അപകടത്തില്‍പ്പെട്ട ബസ് 50 കിലോമീറ്റർ മാത്രം വേഗപരിധിയുള്ള റോഡിലൂടെ 100 കിലോമീറ്റർ വേഗതയിലാണ് ഓടിച്ചിരുന്നതെന്ന് മോട്ടോർ വാഹന വകുപ്പും പോലീസും കണ്ടെത്തി. വളവും ചെരിവുമുള്ള റോഡിലെ അമിതവേഗതയാണ് ബസ്സിന്റെ നിയന്ത്രണം നഷ്ടപ്പെടാൻ ഇടയാക്കിയത്. അപകടസമയത്ത് മഴയുണ്ടായിരുന്നതിനാല്‍ അക്വാപ്ലെയിനിങും അപകടത്തിൻ്റെ ആഘാതം വർദ്ധിപ്പിച്ചു. അപകടസ്ഥലത്തെ റോഡ് നിർമ്മാണത്തില്‍ എന്തെങ്കിലും അപാകതകളുണ്ടോ എന്ന കാര്യം ദേശീയപാത അതോറിറ്റി പരിശോധിക്കും. അപകടത്തില്‍ ഗുരുതരമായി പരിക്കേറ്റ യാത്രക്കാരൻ ഇപ്പോഴും ആശുപത്രിയില്‍ തുടരുകയാണ്.