വൻ കോംബോ ഓഫറിൽ ഷവർമയും ഷവായയും; കഴിച്ച 21 പേർക്ക് ഭക്ഷ്യവിഷബാധ, കട പൂട്ടി

 തിരുവനന്തപുരം: ഷവർമയും ഷവായയും ഉൾപ്പെടുത്തി വൻ കോംബോ ഓഫർ പ്രഖ്യാപിച്ച ഭക്ഷണശാലയിൽ നിന്ന് ഭക്ഷണം കഴിച്ച 21 പേർക്ക് ഭക്ഷ്യവിഷബാധയേറ്റു. തിരുവനന്തപുരം ചിറയിൻകീഴ് കടയ്ക്കാവൂർ തെക്കുംഭാഗത്തിന് സമീപത്തെ ഭക്ഷണശാലയിൽ നിന്നാണ് സംഭവം റിപ്പോർട്ട് ചെയ്തത്.

തിങ്കളാഴ്ച രാത്രിയാണ് സംഭവം. കോംബോ ഓഫർ അറിഞ്ഞെത്തിയ നിരവധി പേരിൽ 21 പേർക്ക് അസ്വസ്ഥത അനുഭവപ്പെട്ടതിനെ തുടർന്ന് വിവിധ ആശുപത്രികളിൽ ചികിത്സ തേടി. ഭക്ഷ്യവിഷബാധയാണെന്ന് സംശയിക്കുന്നതായി ആരോഗ്യവകുപ്പ് അറിയിച്ചു. ചികിത്സയിലുള്ളവരിൽ ആരുടെയും നില ഗുരുതരമല്ല.

സംഭവത്തെ തുടർന്ന് പൊലീസ് കേസെടുത്ത് അന്വേഷണം ആരംഭിച്ചു. ഭക്ഷ്യസുരക്ഷാ വകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി ഭക്ഷണശാല അടച്ചുപൂട്ടി. കടയ്ക്ക് ആവശ്യമായ നിയമാനുസൃത അനുമതികളില്ലാതെയാണ് പ്രവർത്തിച്ചിരുന്നതെന്നും പരിശോധനയിൽ കണ്ടെത്തി.

ഭക്ഷണസാധനങ്ങളുടെ ഗുണനിലവാരം, ശുചിത്വം, ലൈസൻസ് എന്നിവ സംബന്ധിച്ചും വിശദമായ അന്വേഷണം പുരോഗമിക്കുകയാണെന്ന് അധികൃതർ അറിയിച്ചു.