കോഴിക്കോട് പാല്‍ തൊണ്ടയില്‍ കുടുങ്ങി നാലുമാസം പ്രായമുള്ള കുഞ്ഞ് മരിച്ചു

കോഴിക്കോട്: പാലേരിയില്‍ പാല്‍ തൊണ്ടയില്‍ കുടുങ്ങി നാല് മാസം പ്രായമുള്ള പെണ്‍കുഞ്ഞ് ദാരുണമായി മരണപ്പെട്ടു. ചെറിയകുമ്പളം സ്വദേശികളായ നവാസ് - താരിഫ ദമ്പതികളുടെ മകള്‍ ഇനായയാണ് മരിച്ചത്. ശനിയാഴ്ച രാവിലെയാണ് നാടിനെ നടുക്കിയ സംഭവം ഉണ്ടായത്.

കുഞ്ഞിന് പാല്‍ നല്‍കിയതിന് തൊട്ടുപിന്നാലെ പെട്ടെന്ന് കടുത്ത ആരോഗ്യപ്രശ്നങ്ങള്‍ അനുഭവപ്പെടുകയായിരുന്നു. അസ്വസ്ഥത പ്രകടിപ്പിച്ച കുഞ്ഞിനെ ഉടൻ തന്നെ ബന്ധുക്കള്‍ ചേർന്ന് സമീപത്തെ ആശുപത്രിയില്‍ എത്തിച്ചു.

ആദ്യം കുറ്റ്യാടിയിലെ സ്വകാര്യ ആശുപത്രിയിലാണ് പ്രവേശിപ്പിച്ചതെങ്കിലും ആരോഗ്യനില വഷളായതിനെ തുടർന്ന് വിദഗ്ധ ചികിത്സയ്ക്കായി മുടക്കല്ലൂരിലെ ആശുപത്രിയിലേക്ക് മാറ്റി. എന്നാല്‍ ആശുപത്രിയില്‍ എത്തിച്ചപ്പോഴേക്കും കുഞ്ഞിന്റെ ജീവൻ രക്ഷിക്കാൻ സാധിച്ചില്ല. മരണവിവരമറിഞ്ഞ് പ്രദേശത്ത് വലിയ ശോകമൂകമായ അന്തരീക്ഷമാണ് നിലനില്‍ക്കുന്നത്.