അവധിക്ക് നാട്ടിലെത്തിയ പ്രവാസി യുവാവ് പെണ്‍സുഹൃത്തിന്റെ വീട്ടില്‍ മരിച്ചനിലയില്‍

 കോഴിക്കോട്: പെരുമണ്ണയില്‍ പെണ്‍സുഹൃത്തിന്റെ വാടകവീട്ടിലെത്തി യുവാവ് തൂങ്ങിമരിച്ചു. ബാലുശ്ശേരി പറമ്പിന്റെ മുകളില്‍ താമസിക്കുന്ന അറപ്പീടിക പേരാറ്റും പൊയില്‍ കുഴിക്കാട്ട് ഷവാദ് അൻവർ (26) ആണ് മരിച്ചത്.

പെരുമണ്ണ കൊല്ലക്കാംപറമ്പത്തെ വാടകവീട്ടില്‍ വെള്ളിയാഴ്ച രാവിലെ 11.45നായിരുന്നു സംഭവം. പെണ്‍കുട്ടി വിവരം അറിയിച്ചതിനെ തുടർന്ന് സമീപവാസികളടക്കമെത്തി പൊലീസില്‍ വിവരമറിയിക്കുകയായിരുന്നു.

ഒരു നിലയുള്ള ഓടിട്ട വീടിന്റെ ഇടനാഴിയിലെ ഉത്തരത്തില്‍ ഷാളില്‍ കഴുത്തിന് കുരുക്കിട്ട് തൂങ്ങിയ നിലയിലാണ് ഷവാദ് അൻവറിന്റെ മൃതദേഹം ഉണ്ടായിരുന്നത്. അടിവസ്ത്രം മാത്രമാണ് ധരിച്ചിരുന്നത്. 17 വയസുള്ള പെണ്‍കുട്ടിയും ഉമ്മയും സഹോദരനും മാത്രമാണ് വാടകവീട്ടില്‍ താമസിച്ചിരുന്നത്. സംഭവസമയത്ത് പെണ്‍കുട്ടി മാത്രമാണ് വീട്ടില്‍ ഉണ്ടായിരുന്നത്. പെണ്‍കുട്ടിയുമായി പെട്ടെന്നുണ്ടായ പിണക്കമാണ് ആത്മഹത്യയ്ക്ക് കാരണമെന്നാണ് വിവരം. പ്രവാസിയായ ഷവാദ് അവധിക്ക് നാട്ടില്‍ വന്നതാണ്. പിതാവ്: പരേതനായ അൻവർ സാദത്ത്, മാതാവ്: റൗഫിയ, സഹോദരൻ: മിൻഹാജ്.