കൊണ്ടോട്ടിയിൽ വൻ ഗതാഗത പരിഷ്‌കാരം; വലിയ വാഹനങ്ങൾ തിരിച്ചുവിടും

 

കൊണ്ടോട്ടി ടൗണിലെ രൂക്ഷമായ വെള്ളക്കെട്ടിന് ശാശ്വത പരിഹാരം കാണുന്നതിനായി ബൈപ്പാസിൽ മൂന്ന് കൾവെർട്ടുകളുടെ നിർമ്മാണം ആരംഭിച്ചതോടെ കൊണ്ടോട്ടി നഗരത്തിൽ ഏർപ്പെടുത്തിയ കർശന ഗതാഗത നിയന്ത്രണങ്ങൾ മുഴുവനായും നിലവിൽ വന്നു. എന്നാൽ, നിയന്ത്രണങ്ങൾ നിലവിൽ വന്ന ആദ്യ ദിനമായ ഇന്ന് പലയിടങ്ങളിലും വാഹനങ്ങൾ തലങ്ങും വിലങ്ങും ഓടേണ്ടി വന്നത് കാൽനടയാത്രക്കാരെയും ഡ്രൈവർമാരെയും ഒരുപോലെ ദുരിതത്തിലാക്കി.

ചില റോഡുകളിൽ പൂർണ്ണമായും ഗതാഗതം നിരോധിക്കുകയും മറ്റ് ചിലയിടങ്ങളിൽ വൺവേ സംവിധാനം ഏർപ്പെടുത്തുകയുമാണ് ചെയ്തിട്ടുള്ളത്. നഗരത്തിന്റെ പലയിടങ്ങളിലും ഗതാഗതക്കുറുക്ക് രൂക്ഷമാണ്.

പുതിയ ട്രാഫിക് ക്രമീകരണങ്ങൾ ഇപ്രകാരമാണ്:

കോഴിക്കോട് ഭാഗത്തേക്ക് പോകുന്നവർ: മഞ്ചേരി, മലപ്പുറം ഭാഗങ്ങളിൽ നിന്ന് കോഴിക്കോട്ടേക്ക് പോകുന്ന മുഴുവൻ വാഹനങ്ങളും കോടങ്ങാട് - ചിറയിൽ റോഡ് വഴി മേലങ്ങാടിയിലൂടെ എയർപോർട്ട് ജംങ്ഷനിലേക്ക് പ്രവേശിക്കണം.

ബസുകൾ ഉൾപ്പെടെയുള്ള വാഹനങ്ങൾ: കൊണ്ടോട്ടി ടൗണിൽ നിന്ന് കോഴിക്കോട്, എടവണ്ണപ്പാറ ഭാഗങ്ങളിലേക്ക് പോകേണ്ട വാഹനങ്ങൾ മേലങ്ങാടി വഴി എയർപോർട്ട് റോഡിലേക്ക് തിരിഞ്ഞു പോകണം.

ഭാരമേറിയ വാഹനങ്ങൾ: പാലക്കാട്, മലപ്പുറം ഭാഗങ്ങളിൽ നിന്ന് കോഴിക്കോട്ടേക്ക് പോകേണ്ട വലിയ ടാങ്കർ ലോറികൾ ഉൾപ്പെടെയുള്ളവ മലപ്പുറത്തു നിന്ന് തന്നെ കോട്ടക്കൽ, വേങ്ങര വഴി തിരിച്ചുവിടുകയാണ്.

അരീക്കോട് ഭാഗത്ത് നിന്നുള്ളവർ: എയർപോർട്ട്, കോഴിക്കോട് ഭാഗങ്ങളിലേക്ക് പോകുന്നതിന് ആലിൻചുവട് - നീറാട് റോഡ് ഉൾപ്പെടെയുള്ള ലിങ്ക് റോഡുകൾ ഉപയോഗിക്കാവുന്നതാണ്.

നിയന്ത്രണമില്ലാത്തവ: ഇരുചക്ര വാഹനങ്ങൾക്ക് ഈ നിയന്ത്രണങ്ങൾ ബാധകമല്ല. കൂടാതെ കോഴിക്കോട്, എടവണ്ണപ്പാറ ഭാഗങ്ങളിൽ നിന്ന് കൊണ്ടോട്ടി ടൗണിലേക്ക് വരുന്ന വാഹനങ്ങൾക്കും നിയന്ത്രണമേർപ്പെടുത്തിയിട്ടില്ല.

നിർമ്മാണ പ്രവർത്തനങ്ങൾ പൂർത്തിയാകുന്നത് വരെ യാത്രക്കാർ ഈ താൽക്കാലിക ക്രമീകരണങ്ങളോട് സഹകരിക്കണമെന്ന് അധികൃതർ.