കൊട്ടപ്പുറത്ത് രണ്ട് സ്വകാര്യ ബസുകൾ തമ്മിൽ കൂട്ടിയിടിച്ച് അപകടം; യാത്രക്കാര്‍ക്ക് പരിക്ക്

 പുളിക്കല്‍ : കൊട്ടപ്പുറത്ത് രണ്ട് സ്വകാര്യ ബസുകൾ തമ്മിൽ കൂട്ടിയിടിച്ച് അപകടം. പാലക്കാട് ഭാഗത്തുനിന്നും കോഴിക്കോട്ടേക്ക് പോവുകയായിരുന്ന ബസ്സും കോഴിക്കോട് ഭാഗത്തുനിന്നും പാലക്കാട്ടേക്ക് പോകുകയായിരുന്ന ബസ്സുമാണ് കൂട്ടിയിടിച്ചത്. ഇന്നലെ രാവിലെ 7 മണിയോടെയാണ് അപകടം.

കോഴിക്കോട് നിന്നും പാലക്കാടേക്ക് പോവുന്ന ബസ് കൊട്ടപ്പുറം സ്കൂൾ റോഡിന് സമീപം നിർത്തി ആളെ കയറ്റുന്നതിനിടെ പാലക്കാട് നിന്നും കോഴിക്കോടേക്ക് വരുന്ന ബസ് ഇടിക്കുകയായിരുന്നു. അപകടത്തിന്റെ ആഘാതത്തിൽ ഇരു ബസുകളുടെയും മുൻവശം പൂർണ്ണമായും തകർന്നു.

ബസ്സിലുണ്ടായിരുന്ന ഏതാനും യാത്രക്കാർക്ക് അപകടത്തിൽ പരിക്കേറ്റിട്ടുണ്ട്.ഇവരെ ഉടൻതന്നെ സ്വകാര്യ ആശുപത്രികളിൽ പ്രവേശിപ്പിച്ചു.

പരിക്കേറ്റ ആരുടേയും നില നിലവിൽ ആശങ്കാജനകമല്ലെന്നാണ്  വിവരം. അപകടത്തെത്തുടർന്ന് കോഴിക്കോട്-പാലക്കാട് ദേശീയപാതയിൽ ഗതാഗതക്കുരുക്ക് അനുഭവപ്പെട്ടു.